الخميس، 12 مارس 2009

إنت اللي ف ايديك الشفا


إلى "محمد أسامة" و"شيماء زايد"، وكل "صناع الحياة" الذين منحوني أملا في غد مشرق هم شموسه وفجر جديد نسجوا بشموعهم الرقيقة أول خيوطه.


عـمّال تدّور عـ الصـديق

نفسـك فـ يوم تلقى الوفا

عطشـان وتايه فـ الطريق

بـردان ومحـتاج الدفـا

عايش بتصـرخ م الجراح

وانت اللي ف ايديك الشفا

تبكي على العمر اللي راح

وبتشـتكي طـول الجفا


*****

عمر الوفا ما يكون دموع

تنزل تطبطب في الخفا

أو بابتسام ويّا الشموع

يملا القلوب ساعة صفا

دا بيتخلق جوّه الضلوع

مهما الصديق زَلّ وهَفَا

*****

كل اللي محتاجه إيمان

يملا النفوس حب ودفا

وقلوب بتنبض بالحنان

وعيون في نظرتها الشفا
أيمن جمال الدين

الأحد، 1 مارس 2009

الأحلام الضائعة


يوم ورا يوم أحلامنا بتكبر

وبنتمنى نحقق أكـتر

لكن فجأة بنصحى نفكر

ليه الحلم جناحه اتكسر

*****

مرة حلمت بإني باطير

ليا جناح زي العصافير

بس لقيت الخوف جوايا

من صياد تدبيره خطير

*****

مرة حلمت بإني قمر

طول الليل مليان بالنور

لكن غيمة..قبل مطر

حجبت نوري بكل غرور

*******

مرة حلمت بإني سفينة

وسط الموج ماشية بتتمخطر

لكن فجأة شوية ريح

قلبوا الحلم وشفت الأخطر

*****

مرة حلمت بإني شجر

في البستان مليان بالخير

لكن غصني وورقي الأخضر

جا النجار واداه للغير

****

لما كبرت وشفت الدنيا

قلت لنفسي بشكل صريح

عمر الحلم لوحده ما يكبر

جوه خيالي وعزمي كسيح

*****

طول ما الحلم خيال في خيال

يبقى حقيقي عسير ومحال

لازم فورا نعمل شيء

وبإصرار نبدأ في الحال

*****

طول ما الكون مفتوح قدامنا

وبنتامل فيه ونفكر

جايز يوم تصدق أحلامنا

واللي بنحلم بيه يتفسر


أيمن جمال الدين